از برف‌های بی پایان اردبیل تا کولاک سرمای تبریز « داغین اوسته دومان واردیر» همراه با شاعران تبسم رضازاده ؛ ائلمان

تبسم_رضازاده«شدتی»
نیلوفرآبی

بو یولدان تئز قاییت کؤنلوم! داغین اوسته دومان واردیر
گئدیرسن‌سه بیر آز گؤزله! یولاق‌لاردا تیکان واردیر

گؤزوندن سالما، سیندیرما سولار یارپاق‌لاریم بیردن
پاییز فصلینده دردی شعره چکمه! باغری‌قان واردیر

گئدیرسن گئت! اونوتما، درده دولموش کؤنلو آخشاملار
اینان! سندن سورا چوخ گؤزلری یولدا قالان وادیر

درین دویغویلا ال بیر اول! گؤزل قیپجاق سطیرلرده
یقین بیل کلمه آردیندان درین فیکره جومان  واردیر

گل الله دان دیله عشقی! یاراتما شوبهه  دیلرده
اینانجین کولگه‌سینده ساپ سارالمیش بیر گومان واردیر

دیزنلی بیر دوراقدا دور! کی کئچمیش قالدی کئچمیشده
دوزنلی یول یولاق‌لاردا چاشیب، یو‌لدان آذان واردیر

یامان گون‌لرده حسرتله دوروب باش چئینینه قویما
«تبسم»دن اوسانما، سنده آیری ایمتحان واردیر

**************************************************

ا‌.د.ائلمان
«منی یاز»

اوْلسا چاغیر بیرده گلیم، کؤنلونه مهمان منی یاز
سال آیاغین تورپاغینا، اوْلماغا قوربان منی یاز

قییما چتین لیکده قالیم، آیریلیغین یوْخ ثمری
گؤز قاپیسیندا دایانیم، اوْردا نیگهبان منی یاز

یاز کی گؤرن لر دئمه سین سئوگیمیزین یوْخ چیخاری
کویینه یوْل وئر جانیمی گۆلشنه باغبان منی یاز

بیر ده لی بیر بوْش قویویا سالسا اؤزون عیبی نه دیر
بیر دوْلو عشقین دنیزین، اۆزمه یه فرمان منی یاز

یار سؤزونون خسته سی یم، باغریمی یار، گؤر یارامی

گلمه یه لوقمان نازیسان، بورجوما بیر جان منی یاز

باخکی محبّت مئیی نین گؤز دوْلو پیمانه سینین
دامجی سینا مشتری یم، تاپماغا ایمان منی یاز

آچ گؤروشون باغلی یوْلون، ساحیله وارسین اۆره ییم
سن دنیزین وورغونویام، دالغایا حئیران منی یاز

آلما یاناقدان پاییمی، غۆنچه دوْداقدان بالیمی
خوْش باخیشین عطرینه بۆک، اۆستونه عنوان منی یاز

بیر ده لی شاعیر آدینا سسله گلیم ائلمانینام
جان منه جانان پایی دیر، اوْردا غزل خوان منی یاز

********************************************

به همت پونه اصغر پور