اشعار شاعران مخاطب ترک زبان ایران (برگزیدگان مسابقه شعر در رسانه ایرانیان اروپا)

اووچو مین عشق ایله داغلاردا مارالسیز دولانیر
اوج، بوجاقسیز گؤیو هئی سانکی آی، اولدوز دولانیر

وطنی چوخدا اونوتما! دیدیلیر داغ، داشیمیز
آت بئلینده، قمه، قدداره‌لی چنگیز دولانیر

ایندی اَینیمده گلینلیک دونو گوللنمه‌ده‌دیر
هله بئینیمده منیم هر گئجه بیر قیز دولانیر

تئلیم آلتیندا سوکوت پلمه‌له‌نیر گیزلیجه‌سی
کلمه آردینجا بوغازلاردا یئنی سؤز دولانیر

یارالار، هر یئره گئدسم سورونور کؤلگه‌م‌ایله
سانکی اورمو یاناغیلا قاریشیب، دوز دولانیر

من دنیزلرده ده سنسیزلیییمی بوغدوم، آخیر
یئنه ده هر گئجه ساحیلده درین ایز دولانیر

ائل گؤلو تک‌لیقیله کؤکسو «تبسم»لی چیچک
گؤزومه اورمو دورورسا، باشا تبریز دولانیر

من گؤزل‌لیک‌لری اوخشاتمالی‌یام بیر غزله
او گلین‌دیر باشینا بیر نئچه بالدیز دولانیر

#تبسم_رضازاده«شدتی»

***********************
غریب گونلریم

آتئلیب قوربته ازلدَن داشئم

آغلاییب گوزلَریم اَلنسین یاشئم

وطن حسرتیننَن آغاردی باشئم

قوربتده آغلاییب گئجه یاتمیشام

عومرومون گونلَرین هِئچه ساتمیشام

دونیانین کَدَری جانئم داغلاییب

یاشایئش یوللارین منه باغلاییب

اِئلیمنَن آیئریب،سورگون ساخلاییب

سوسدوروب حالئمی غمه باتمیشام

وطن وای دِمیشم ،نَنه یاتمیشام

ناشی سوداکارام بو یاد اولکه ده

“اِئلیار”حَسرَت قالئب گونه،کولگه ده

آتام یوخ دانلیا ، دُوه، اوءرگَده

قوربتده باشیمی هئچه قاتمیشام

جَنَّتی بوراخیب کِئچه ساتمیشام

#سخاوت_ائلیار
آغلا #حسین

**************************
نه رمضان، نه شعبان، نه محرم
گونوم، آییم، ایلیم،اوْلوبدور ماتم
چوْخ زاماندیر کؤنلوموزه دوْلوب غَم
حالیمیزا سینه وی داغلا #حسین
بیز سنه یوْخ،سن بیزه آغلا #حسین

دینیمیزی سیاسته قاتدیلار
دین آدیلا بیزلری اوْیانتدیلار
سردارلاریم توْپراغ آلتدا یاتدیلار
کهنه یارالاریمی باغلا #حسین
بیز سنه یوْخ ،سن بیزه آغلا #حسین

شرمنده لیک تَری آنلیمدان آخیر
آتام – آنام منه خجالت باخیر
یوْخسللوقدور قلبیمه خنجر تاخیر
آغلاماقا گؤز یاشین چاغلا #حسین
بیز سنه یوْخ ،سن بیزه آغلا #حسین

من، آنامین غئیرتیندن دوْغولدوم
اؤزوم-اؤز ایچیمده دالدیم،بوْغولدوم
غَم کدردن پاچالاندیم اوْغولدوم
جان یارامی اؤزون گَل ساغلا #حسین
بیز سنه یوْخ ،سن بیزه آغلا #حسین

گؤز یاشلاریم آخدی،فرات اوْلمادی
سیندی قوْل-قانادیم، نجات اوْلمادی
«آتابه‌یَ » یاشام، حیات، اوْلمادی
حق آلماق‌چین قیلینجین یاغلا #حسین
بیز سنه یوْخ ،سن بیزه آغلا #حسین

#ابوالفضل_کریمی( آتابه‌ی )

***************************
تهیه:پونه اصغر پور
تنظیم: رامک تابنده