شعر اقوام (ترک زبان)ایرانی مخاطب رسانه ایرانیان اروپا با “پونه اصغر پور”

 محمد محمدپور
۱۳۶۸ینجی ایلده قاراداغین ورزقان بولگسینین ائولی (اویلق) کندینده دونیایا گؤز آچمیش
ایندیسه تبریزده یاشاییر
#تخلص کنداوغلو

 گئدین دئین دوغما آنا یوردوما
قول بویون اولماقا بالان یولدادیر
سنین دردلریوی سنین آغریوی
بو شیرین جانینا آلان یولدادیر

دئین کوراوغلونون تاییدیر گلن
نبینین عیواضین هاییدیر گلن
جمعی ایگیدلرین ساییدیر گلن
دوشمانا ولوله سالان یولدادیر

بیر نیشانی واردیر گل دئیم تانی
تانیماز پاشانی تانیماز خانی
یولوندا دوغرانیب تؤکولسه قانی
یقین ضفر مارشین چالان یولدادیر

کنداوغلو ائلیندن گوج آلان گلیر
یاغیدان ساتقیندان باج آلان گلیر
وطن کؤلگسینده اوجالان گلیر
حسرتی اورگده قالان یولدادیر

#کنداوغلو محمد ائولیلی (اویلق)

نئیلیم

منه عشق اؤیره‌دن جانان، پشیمان اوْلسا من نئیلیم؟
منی باشدان آتیب یارِ رَقیبان اوْلسا من نئیلیم؟

مَلک ساندیم اوْ جانانی چون عشقین بی‌ریا گؤردوم
دیلیم لال، آغزیما توْپراق ،اوْ اینسان اوْلسا من نئیلیم؟

اوزون مدّت‌دیر ای جانا سینم‌ده سیرری گیزلتدیم
اگر بیر گون بو اَلکن دیل غزلخوان اوْلسا من نئیلیم؟

گؤتوردون یایلیقی باشدان ندن روزگاره تاپشیردین
اوْ آغ اوزده قارا زولفون،پریشان اوْلسا من نئیلیم؟

نظر ائت بیدِ مجنونه بیر آن ای سَرو خوْش قامت
سنین قارشیندا توم گوللر، مُغیلان اوْلسا من نئیلیم؟

اؤپندن بال دوْداغیندان اینان هر گون سیَه مستم
فراغیندان اگر بیر غم هزاران اوْلسا من نئیلیم؟

گووَنمیشدیم سنه هر آن، ائل ایچره چوْخلو خوار اوْلدوم
بو گون قارشیمدا دشمن‌لر خُرامان اوْلسا من نئیلیم؟

بهارِ عُمرومه باخسان گؤرَرسن کی خزان اوْلموش
گونش باتسا حایاتیم توم شَبستان اوْلسا من نئیلیم؟

منه چاره بو ظلمتده فقط نورِ مسیحادی
اینانجی باشدان آتسا دِل، مسلمان اوْلسا من نئیلیم؟

کلیسا یوْخ، من عشقیندن سٌلوک و عرفانا آزدیم
یانان قلبیم طریقت‌دن گُریزان اوْلسا من نئیلیم؟

داها صبحوم شاما چاتماز، دئییرلر شامِ آخردی
بو گون شامیم اگر شامِ‌ غریبان اوْلسا من نئیلیم؟

«آتابه‌ی » عشقیدن یازسا اینان کی قان سوزَر دفتر
سنین‌چین یازدیغیم سؤزلر، دئ دیوان اوْلسا من نئیلیم؟

#ابوالفضل_کریمی ( آتابه‌ی )

تنظیم :پونه اصغرپور

دبیر شعر اقوام رسانه