شنبه ها با شعر شاعران اقوام ایرانی-شاعران

چکیرم

دایان، آیاق ساخلا، گؤزلریمه باخ،

من عاشق نازینی بئله چکیرم…

اورکدن سئومکده دئییل کی گوناه،

دردین شله‌سینی پیله چکیرم.

بو عشق آتشیمی یاییر هر یانا،

گؤزومدن اود آلیر باخ یانا-یانا…

روحومون آتشی سیغمیر جهانا،

عشقین ذیروه‌سینه پیلله چکیرم..

وارلیغیما هوپان گولون عطرینی،

چمنین عطرینی، چؤلون عطرینی..

یاغیشین عطرینی، سئلین عطرینی،

اؤزومله سن گلن یولا چکیرم..

ماحال ‏قیزی عشق‏له تاپار مورازی،

دیندیرر سینه‌ده صدفلی سازی..

اؤتوروب عؤموردن پاییزی، یازی،

بمی پرده‌لردن زیله چکیرم..

ائلمیرا ماحال‏ قیزی

 

 

 

 

سؤک آپار

هجرانینلا داش اوسته داش قالادین،

گل روحومو بدنیمدن سؤک، آپار.

ویران ائتدین قلب ائویمی، تالادین –

گؤز یاشیمی اوووجونا تؤک، آپار.

قالماییبدیر نه طاقتیم، نه تابیم،

چوخالیبدیر حسرت یوکلو عذابیم،

سندن سونرا باغلانیبدیر کیتابیم –

دردلریمی اؤزون ایله چک، آپار.

کسیلیبدیر سئوگین منه هئی غنیم،

حیاتیمی آلت-اوست ائدیب گئدنیم،

پارام -پارچا اولوب روحوم، بدنیم –

باجاریرسان حصّه-حصّه تیک، آپار.

دردلر منیم اوره‏‌ییمه سالیب ایز،

یورغون دوشدوم، چکه بیلمیر یوکو دیز،

جانیم وئردیم، جوجرمه‌دی سئوگیمیز –

گل یئنیدن گؤز یاشینلا اک، آپار.

یئگانه ممّد اووا

 

 

 

 

 

اؤزۆمۆزده اؤز آختاردیق!

اوْلماسایدیق، نه یاپاردیق!

بیز بیله بیر یولا واردیق

نه یوْل بیتر، نه ده یولداش.

 

بوْیوْل بیزی دره – دره

چاتدیرار کنده ، شهره

گۆنش دوْغار کؤلگه لره

نه یوْل بیتر، نه یوْلداشلیق.

 

گۆندۆز گئدر، گئجه گلر

بولودلار گؤزیاشی الر

گۆل داشی دلیب یۆکسه لر

نه یوْل بیتر، نه یوْلداشلیق.

 

یاز یاشیلا آداقلانار

یایی ، پاییزا جالاقلانار

بار باغلارا قوناقلانار

نه یوْل بیتر، نه یوْلداشلیق.

 

آنجاق دوْغار قیشین گۆنۆ

یئل داغلارا سالار اۆنۆ

دوی یاسانی، دوی اؤلچۆنۆ

نه یوْل بیتر، نه یوْلداشلیق.

 

یوْل بیزه اسگی تانیشدیر

آچی ائله فیرلانیشدیر

دانیش، یولونو دانیشدیر

نه یوْل بیتر، نه یوْلداشلیق.

 

م. خوشنام

 

 

 

هرشاخان ائیلدیریم یاغدیرا بیلمز

گوللره شه قسمت اولا اولمایا

قارسیز قیشین یازی باغبان آقلادار

بیر سیزقه سو چایا دولا دولمایا

 

قسمت اولور یوخسولوقون بلگه سی

ازلدن قیسیلیب اونون بولگه سی

اودلارا یاندیرار نامرد کولگه سی

شک ائیله مه رنگین سولا سولمایا

 

کیمسه دوردوراماز چرخین گردیشین

سونی زلالتدی یاقین ترس ایشین

چالیشما بهارا عومروون قیشین

شئیور بهار رنگین سالا سالمایا

 

شئیور

 

 

 

 

نام:محمد

 

نام خانوادگی:محمدلو

 

تاریخ تولد:۱۳۳۴

 

فعالیت هنری:شاعر

 

تخلص شعری:(انجمن)

 

اثر چاپ شده(خیالین کونلومه قوناق گلنده)

 

 

 

کونلوم عاشیق اولوب دوشدو داغلارا

اوزون آرزولاریم چوللرده قالدی

بولبولون قلبیندن آخان قیزیل قان

یاخیلیب چمنده گوللرده قالدی

راضی سالانمایب کیمسه فله یی

اولدوروب قبر اوسته قوردی کله یی

یاشیل باش صونانین آرزو دیله یی

چوللرده قورویان گوللرده قالدی

 

هانی کوراوغلونون نازلی نیگاری

قالماییب کرمین صبر و قراری

فرهادین کولونگی حللاجین داری

داستان اولوبان ائللرده قالدی

 

سالمادی بیر کیمسه مجنونو یادا

دولاندی داغ داشی دائیم پیادا

لیلی نین زولفونون عطری دونیادا

چمن لرده اَسَن یئللرده قالدی

 

صبرینی الیندن آلیب جانانی

گوزلریندن آخیر اوره یین قانی

بیچاره صنعانین دینی ایمانی

خومارداکی ساری تئللرده قالدی

 

دوشه او گوزلین بوردان گذاری

درمان اولا خسته جانین آزاری

خان چوبانین ساراسینین مزاری

آرپا چاییندا کی سئللرده قالدی

 

دولاننام باشینا پروانه کیمین

گوزدن یاش اَله ییم دوردانه کیمین

عشقیمیز (انجمن) افسانه کیمین

سینه لرده گزیب دیللرده قالدی

 

 

 

 

دبیر بخش شعر اقوام ایرانی پونه اصغرپوز

1.