شنبه ها با شعر شاعران اقوام ایرانی _شاعران

محرم ولی پور « خوْشنام» ۱۳۴۵ ینجی گۆنش ایلینده قاراداغین گۆللۆ چیچکلی قوینوندا یئرلشن قارابولاق کندینده دۆنیایا گؤز آچمیش

 

 

‍ مندن اینجیمه

 

 

زامان وراغیندا گلسک اۆز – اۆززه

یوْلونو باغلاسام ، مندن اینجیمه ،

باشیمی سؤیکه ییب سنین چینینه

دؤیونجا آغلاسام ، مندن اینجیمه .

 

سو اولسام قارشیندا آخا – آخا من

یاندیرسام جانیمی یاخا- یاخا من

گؤزل گؤزلرینه باخا – باخا من

سینمی داغلاسام ، مندن اینجیمه.

 

سیخسام اۆره یینی بو گئت – گلیمله

اؤیسم گؤزلرینی بیر غزلیمله

ساچینا گۆل تاخسام چیرکین الیمله

اؤپۆب ، قوجاقلاسام ، مندن اینجیمه .

 

باشیمدا دومان وار، گؤزلریمده چن

توتسام اللرینی بوراخماسام ، من

بیرده گۆله – گۆله سئویرم دئسن

سسینی ساخلاسام مندن اینجیمه.

 

گؤزلرین گؤزۆمه دئمه سه هیمی

پاسلانار باغریمین اینله ین سیمی

گؤرۆشه گلمه سن بیر دلی کیمی

سنی سوراقلاسام ، مندن اینجیمه .

 

«خوْشنام» یانا – یانا یالواریر سنه

گؤزلری گۆزگۆده یاغیر آغ دنه

دؤنسم یوْللاریندا دومانا ، چنه

دوماندان اینجیمه ، چندن اینجیمه،

قوربان گؤزلرینه مندن اینجیمه !…

 

م. خوْشنام.

 

معصومه مهریار متخلص به تبریزلی داملا گۆنش ایلی ۱۳۴۶ دا تبریز شهرینده دۆنیایا گؤز آچمیش

 

 

 

بئله دوْسلوق اوْلماز، بئله یوْلداشلیق

نه اوْلار وفالی اوْل، داریخماییم

سئودا تارلامیزین سئوینج گۆلۆندن

منیم چۆن دَر نئچه کوْل، داریخماییم.

 

آغزیمین تامی سان، سؤزۆمۆن شعری

قاییتما دالییا،چکیلمه گئری

باشین آغریییرسا قوْلوم دور یئری

گَل سالیم بوْینونا قوْل، داریخماییم.

 

گؤرۆش ائیوانیمیز یئتیریب سنی

باخیشیم هر یانا بیتیریب سنی

سانیرام اللریم ایتیریب سنی

آچیل چیچک- چیچک سوْل، داریخماییم.

 

بو کؤنۆل نئیله سین سن ائشیتمه سن

اوْ قَدر گئجیکدین ساچیم توتدو چَن

یا سن اونودورسان، یا کۆسۆرم من

تاپ بو کۆسگۆنلویه یوْل، داریخماییم.

 

سنی نئجه آتیم، نئجه اونودوم؟

گؤزۆمۆن یاشیلا سۆرمه نی یودوم

گَل سئودا قوْخولو سئوگی بولودوم

(داملا) اۆره ییمه دوْل،داریخماییم.

 

معصومه مهریار

✍تبریزلی(داملا)

 

اولدوزتک پارلاییر شمشک تک چاخیر

آز قالیر ناحق قان سالا گوزلرین

مژگانی اوخونو قلبیمه تاخیر

ایستیرکی جانیمی آلا گوزلرین

 

قاشلارون کماندی گوزلرین آلا

حئیران قالدیم آغ یاناقدا او خالا

آچ قولاش قوللارین بوینوما دولا

بیر عمر خاطرم اولا گوزلرین

 

دوداقلار قایماقدی گوزلر پیالا

بویازیق شئیوری سالدین نه حالا

آرزیم بودور سنلن سالام قول_قولا

بیرآز بو دردیمدن آلا گوزلرین

 

شئیور

 

 

علی جباری

متخلص علی معلم

ازل گؤندن بو دونیایا گلنده

اؤزون منه وئردی نیشان یوخسوللوق

ها ایسته دیم بلکه الیندن قاچام

اولدو منه مونیس هرآن یوخسوللوق

 

آنا تک یاتمادی منی گؤزلدی

هارا گئتدیم ایزلریمی ایزلدی

بیردردیمی لاپ چوخالدیب یوزلدی

ائتمه دی بیر درده درمان یوخسوللوق

 

بوراخمادی بیر الیمی الیندن

هرنه دئدیم اینجیمه دی دیلیمدن

ترپشنده بیر داش سالدی بئلیمدن

اولدو آییق بیر نگهبان یوخسوللوق

 

هئچ گئیمه دیم اوندان بیر نوع لباسی

هرآن توتدوم تازا دردلردن یاسی

هرزامان ائله دیم بیر زاد سووداسی

اوندادا تئز وئردی زیان یوخسوللوق

یول آختاردیم بلکه الیندن قاچام

قارانلیغا شاید بیر ایشیق آچام

ثروت اوچون منده بیر اَلم ساچام

توتدو یولو ائتدی پئشمان یوخسوللوق

 

ازلدن بوش ساخلادی تاباغیمی

هربیر ایشده تئز آلدی قاباغیمی

قوجاقلادیم قملی دیز آیاغیمی

اولدو منی دالی سالان یوخسوللوق

 

منده بیر اینسانام دولتلیه تای

نه دن اولدو بو یوخسوللوق منه پای

علی سنده پول یئرینه دردی سای

دئه سن ائتدین منی نالان یوخسوللو

 

 

~~~~~~~~~~~~~~~~~~~~~~پونه اصغرپور ~~~~~~~~