نام کاربری یا نشانی ایمیل
رمز عبور
مرا به خاطر بسپار
ایلاهی سئوگی نین پایی سان آنام!
گئتمه تورپاقلارین آراسینا سن
نه اولار گئجه لر یوخوما گلسن
قدم قوی گؤزومون قاراسینا سن
گؤی لری دولانیب گون کیمی باتدین
گلمه دین “صنمی” یامان یوباتدین
واختسیز خزان اولدون مزاردا یاتدین
دؤزدون بو دونیانین یارا سینا سن
باجیلار باش-باشا آغلادی گئتدی
ابدی آیریلیق داغلادی گئتدی
بالانین قوللارین باغلادی گئتدی
های وئر بو نیسکیلین چارا سینا سن
زهرا فردی مغانلو
(ساچلی )
دوداقوندان ویر ایچیم آب حیاتی , گوزه لیم
نه اولار لوطف , ایده سن بو حسناتی , گوزه لیم
منیم علمیم چاتا بیلمز ایده توصیف سنی
حسنوه چوخلی چئویردیم صلواتی گوزه لیم
ایتمه رسوا النیر گوزیاشی رحم ایله منه
قویما آخسین یوزومه بیله قناتی گوزه لیم
یورولوبدور قلمیم بسکه یازیبدور غزلی
قورتولوب گوزیاشی قان ایتمه دواتی گوزه لیم
قوی سالیم یادیوه , بیرگون گوزووه سویله میشم
شبنمه اوخشور اوزونده قطراتی گوزلیم
ای بویون قوربانی عاشقده توان یوخ بو غمه
سئویره م من سنی زهر ایتمه حیاتی گوزلیم
چای گتیر گل اوتی منده باخیم اول گوزلرووه
چای الونده گوروم اول شاخ نباتی گوزه لیم
منوری
ائله بیل مین ایلدیر سئویرم سنی
شهر دن خاطیره قوخوسو گلیر
هر یئره باخیرام سن گورونورسن
دئیسن شهرین یوخوسو گلیر
سنی گورمک اوچون یاشاییرام من
گرچگی خیالا قاتیرام هرگون
بلکه یوخومادا گلرسن دئیه
سنی گورمک‌اوچون یاتیرام هرگون
سنی گورممکدن یامان قورخورام
هرآن یاشاد منی او ناز باخیشلا
ایزین‌سیزدیر اگر بو قدر سئومک
سن الله سئوگیلیم منی باغیشلا
سن‌سیزلیک قورخوسو قوجالدیب منی
گوزگویه باخدیقجا گولمییم گلیر
ناهید‌ه دویغولار اولدوکجه بیر بیر
اونلارا بیرلیکده اولمییم گلیر…….
ناهید طهماسب پور
یالان
بو قاپان دوز ایشله‌میر، چکیلن چکی یالان،
نه گؤردوک عؤمور بویو، یالانمیش پکی یالان!
بیر تیکه چؤره‌ک اولدو، دوماندا ایتدی دوزلوک
گول آچدی اؤنوموزده، واریدی نه کی یالان
بوتون یئر یالانلاری، ایتیردی کَسَرینی
چاخناییب باشیمیزدان، یاغدی گؤی‌ده کی یالان
قالمادی آلچی، توخان، سؤزونده زامانه‌نین
فیریلداق اولدو بؤکو، دانیشدی جیکی یالان
یالان وار داماریندا، بیر چیرتما دوغرولوق وار
گَل ایندی یالانلارین، تَمَلی کؤکو یالان!.
#سخاوت_عزتی
این مطلب بدون برچسب می باشد.