نام کاربری یا نشانی ایمیل
رمز عبور
مرا به خاطر بسپار
۱۳۵۳ نجی ایلده ، شبستر شهرینده دونیایه گلمیشم ، اؤزومو تانییاندان ، دوشونجه م ، آتام و آنام اوخویان شعرلر و ماهنیلار و بایاتیلارلا بسله نیب ، سونرا شعر و ادبیاته ماراقلی اولارکن ، چوخلو کیتابلار اوخوموشام ، دبیرستان دا جیزما قارا یازیب ، اوره ییمی بوشاردمیشام ، آمما دوزگون و جیددی حالدا شعر یازماغی ۱۳۹۰ نجی ایلدن باشلامیشام ، تورکجه و فارسجا شعر یازیرام ، بیلگی سایار و حقوق رشته سینده یونیورسیتی ده لیسانس آلمیشام
ياز قیزی نین غزلی
ياز قیزی سئیره چیخیب ائل_ اوبامین توپراغینا
دؤشه نیب گول چیچه یی، تئللی_ ایپکلی داغینا
قایناییر چشمه لری، سس وئره جوشقون _ جوشقون
هاوانین مین کره چئوریلمه سینه، چیلپاغینا
یئل اسنده چمنی دالغالانیر تئل سایاغی
بیر اتک گول گتیریر سولغون اوره ک لر باغینا
بیر سوزنباغ گؤیه ریب گؤل ده کی آی گؤیدن ائنیب
هر گئجه بوسه وئریر هم سولونا، هم ساغینا
داغلارین اینجه بئلینده یاشیل اؤرپک ساریلیب
ساری بولبول اوخویور قیرمیزی گول بایراغینا
دانیشیرلار ائله بیل منله تانیش قاپ _ باجالار
هر آغاج پای گتیریر سؤزلرینی یارپاغینا
وورغون ایللر کیمی اوچسام ائلیمیزده یئری وار
قوی سئوینجک له بوراخسین سؤزون ” آیتای” چاغینا.
مهناز. صابونی. آیتای
صابر دلیر متخلص به بولوت
وی در سال ۱۳۵۶ در دیار استاد شهریار دیده به جهان گشود. وی جهت ادامه تحصیل در سال ۱۳۷۴ از شهر تبریز به تهران رفت و پس از اخذ مدرک دانشگاهی در این شهر ساکن گردید. علاقه وافر ایشان به شعر و ادبیات منتج به مجموعه اشعار وی در دو زبان تورکی و فارسی گردیده که در سال ۱۴۰۰ تحت عنوان یاد یار به چاپ رسیده است.
قوجا عاشیق
گَل عشقه ساری بیر داها دونیا گوزل اولسون
سوز دفترین آچ شعرده رویا غزل اولسون
بولبول اوخیور گول هوسینده گجه گوندوز
سنده صنمیم گول منه سرکه عسل اولسون
مریم کیمی بیر گول دولانا عطری چمنده
عشقیله یاشار باغچادا گول لر، مثل اولسون
سن تک بولوتون دامجی سی توشسه قوری باغدا
سِودا آغاجی گول گتیرر تا ثمر اولسون
اصلیله کرم نغمه سینی سازیله سویله
عشق عالمینین پرده سینه بیر اثر اولسون
گون تک یاییلا پارلاق ایشیق نازلو اوزوندن
خنجر کیمی ییرتار گجه نی تا سحر اولسون
زولفون دوگونو کونلوم ادیپدور بئله مجنون
آچ ساچلاری گوستر یله دیوانه تر اولسون
سن عشق اوینه تازه گلین من قوجا عاشیق
بیر گوشه ی چشم ایله بو جان تازه تر اولسون
آسیلدیلار سنی
سنی آسدیلار
یعنی؛
تبریزین دار کوچه‌لریندن آسدیلار سسینی
آلیب اووجوما سسینی چیغیردیم
یولا سالدیلار سنی بیزدن
قارقالار آپاردیلار آغاج‌لاری دا
سئوگیمی چاتدیلار سسینه
پاییزین خومار یاغیشین‌دا
ال‌لرین آرخادا قالمیش اوزاقلیغی، اوزاق‌لاردا
اوزاق‌لار سسین دی
سسینی چاغیر یوسون ساچ‌لاریمی .
بیر آغاج منی قرنفیل چاغیردی
بورنو قانادی قرنفیلین
دوردو ییخیلدی
نفسی قرنفیلده کسیلدی…
وای
وای….
مرجان مناف‌زاده
بو آغاج
شئعره بوکولموش
سو کیمی ماهنیلار آخماقدا یاشیل یان، یؤره‌سیندن
درده قات_قات قاتیلیر
گیله‌لنمکده کئچن خاطیره‌لر گؤزلرینه
سئوگی سالخیملانیر اولدوز کیمی کیرپیکلردن
سؤزلریندن سوزولور قانلی قیلینجین یاراسی
پارالانماقدادیر آماجی،
آجی عیصیانلا.
باخیشی آغری‌لی سئودا
اوخ توخونموش بیر اینانج
یاراسی اوستو آواستا
آختاریر رؤیالاریندا لایلا
بو نه حالدیر، بو نه قال؟
واوئیلا!
وارلیغی پؤهره‌له‌نیر خاطیره‌لردن گئرچک
گولوشو جانلی تیکانلا سؤیکک
گؤینه‌ییر آرزولاری
قینانیر هر یئردن
دوننی آه‌لی پاییز سیمگه‌لری
ایندی‌سی کورلوق ایچینده
آغی‌لی ایمگه‌لری دیلده بوی آتمیش
و آتیلمیش قارقیش
شئعرینه گؤز یاشی داممیش شاعیر
آجیلیقلاردا چالیقلانمادا کئچمیشلری
آ…ه
و سوسوز آغری‌سی دوزلاقلاردا
دورنالار اللری قوینوندا داریخماق اوزره
ایسته‌یی سیسقا یاغیشلار
گؤیه‌ره ماوی باخیشلار.
ساوالاندان گونشی گؤزله‌یه‌رک
دیکسینیر رؤیالاری
ارزوروم داغلاری قبریستانلیق
اؤتن ایستکلرینه.
کئچه‌جکدن چکیر ایت کورلوغو آخشام باشی‌لار
گوندوزو ظالیم اسیر بئینینده
یاشامی تورپاغا دوشموش یارپاق
یارا قاسناق، قاسناق
اورمونون کؤکسو کیمی.
اوزانیر کؤلگه‌سی آلتیندا آجیقلی ایللر
هؤرولور نیسگیللر
العطش‌لیک‌له ساغیر کؤلگه‌یه ائرکک بولودو
کور اولوبدور اومودو
کیملییین آستاناسیندا بو دیدرگین سئودا
اؤزون آختارمادادیر
داغ، داشی قاتلایاراق.
اوره‌یی اینجه
درین حسرته باغلی
بولودا بویلو، آداقلی
یوخوسوندا دیکه‌لیر وارلیغینین دالغالاری
الی دوستاق قوجاغیندا
دایانیبدیر کئچه یالقیزلیغینی
آن‌لاردا
دئمک اولمور سؤزسوز ؛
بیر طرفدن الی جننت کسییی
کلمه-کلمه سئویشیر گوللر الینده
دیمدییینده نغمه
و آذان چکمه‌ده قوشلار نفسین
کؤلگه‌سینده یاتیشیب قیرمیزی دونلو پری‌لر
اونا دیل وئرمه‌ده تانری،
تانیدیر سئوگی یولون.
قول، قانادسیز اوجالیقلاردا اوچور
الی، اللرده اوغورلار بئجریر گؤیلرده
هئی ایشیقدیر کی ایچیر.
یوللانیر سؤزلری اولدوزلارا پای
گولوشو آی‌لی باخیشلاردا یاییلمیش احسان
دیلینه چوخ قوزو قوربانلیق ائدیر عائله‌سی
تانری یازمیش بئله‌سی…
نه بیلیم؟!
بلکه بیر فلسفه‌نین قاتقی‌سی‌دیر
قازامات سورگونو اولموش
سارماشیق بویلو چیچک
یا دا چیرکین باخیشین نار گیله‌سی؟
آی‌لا، اولدوزلا سویوق بیر اؤپوشون پارلاماسی؟
آلما دادلی یاناغین دیش یاراسی؟
لالانین باغریندا.
بلکه ده ؛
یول اوزو بیر قانلی گؤروش فاجیعه‌سی؟
بلکه ده دوغرو بیر آرزی
سئویلیب، سئو‌مه‌یه دهشت‌له تامارزی.
نه دئمک؟!
بلکه ملک‌دیر یئره ائنمیش
آدی سئودا آغاجی؟.
یعقوب_نیکزاد
دردلی نه چکیر
اهل کئفه دئمه خسته نین حالین
نه غمی وار بیله دردلی نه چکیر
نه سیزلاماق لازم ، نده آغلاماق
دردلی بیلر ائله دردلی نه چکیر
……………………………….
باشی قارلی داغا بیر نظر ائیله
کؤزه ریمیش تاغا بیر نظر ائیله
خزان وورموش باغا بیر نظر ائیله
باخ گؤر سؤلقون گوله . دردلی نه چکیر
………………………………………..
زندان اولموش ائوین دؤرد بوجاقیندا
بؤی آتیب بؤیویه ن غم قوجاقیندا
بللیدیر اؤت دوتوب دم اؤجاقیندا
باغری دؤنن کوله دردلی نه چکیر
(غم اوغلو) بير كسين باشی چکمه سه
هجرانین الیندن قان یاش تؤکمه سه
محنت اؤخو قلبیین یاریب سؤکمه سه
بیلمز هله هله دردلی نه چکیر
……………………………………….
شاعر غم اوغلو
دبیر سرویس شعر اقوام ایرانی(زبان مادری):پونه اصغر پور
این مطلب بدون برچسب می باشد.